日圓跌跌跌！ 遊日掃貨必知4件事

日圓跌跌跌，望咗半年日圓真係再創新低，呢個 moment 報 6.243 港元兌 100 日圓，心思思想即刻出機票過日本掃貨。有咩要注意？即刻同大家睇睇！

1. 搵平機票

掃貨掃得筍，都要機票夠平至得！而家廉航成日做 promote，大阪、東京呢啲熱門航點，抵到千幾蚊就可以有來回機票包行李。

如果想搵平機票，可以去 www.skyscanner.com.hk，入面會幫你 search 唔同航空公司、訂票網站嘅價錢外，最醒目嘅係，識得計埋拆開兩間唔同航空公司 book 來回機票嘅，例如坐 HKExpress 去、Jetstar 返，幫大家搵到至抵同最適合嘅時間。

▲ 相片來源：ezone.hk

2. 筍購攻略

要買得筍，第一件事係要識搵錢。講緊嘅係點樣最筍換日圓，最出名最靚 rate 嘅通常度係百年找換店，但有時永隆銀行都幾好，不過大家如果唔係換幾十萬 Yen 嘅話，去百年花上嘅車錢同埋時間可能補唔返，去 http://hk.ttrate.com/zh_hk/?c=JPY 就可以見倒各大銀行同百年嘅匯率。

小記都係經常遊日血併嘅一分子（所以做唔倒月儲 $3,000 買樓），但通常係去當地先撳 10 萬 yen，因為用電匯 rate 計再加幾十蚊手續費，都唔算太貴，只要你記得開海外提款功能，就省時方便。

而且小記係算死草之人，識得揀信用卡，其實抵過用 Cash，例如 DBS Eminent 海外簽夠 $5,000 就有 $300 回贈；東亞卡海外簽夠 $5,000 就有 $200 回贈，雖然話外幣交易有 1.95% 手續費，但呢啲卡回贈返 4% 至 6%，抵返曬啦，最平過用 Cash 啦。

3. 退稅須知

去日本買嘢而家有成 8% 消費稅，其實幾貴架！不過，大家拎住 Passport 以旅客身分入境都有免稅或者退稅。通常獨立舖都係直接做免稅，而大型百貨公司或者大型連鎖店，就俾錢時先俾咗稅先，然後再去返同一公司嘅退稅 counter 拎返 Cash。

但想有得退稅，都要符合一系列嘅條件，首先要係去「可退稅店鋪」買，詳情可按：http://tax-freeshop-wifi.jnto.go.jp/。然後係要同日、同店買滿消耗品逾 5,000 日圓，或一般貨品逾 10,000 日圓先可以。例如最多 ezone.hk 粉絲關心嘅電子產品，就要買夠 10,000 日圓先 OK。網購暫時無得做退稅。

買完免稅品，會釘份表去 passport，大家去到機場唔好以為有得再拎退稅，而係將份表交返去機場個稅關，等日本海關知道你已拎免稅品出境。

雖然稅關係位於機場按檢與出境檢查之間，但大家唔一定將免稅品隨身攜帶，日本國家旅遊局 JNTO 回覆 ezone.hk 記者，話免稅品一樣可以寄倉，只要寄倉時告知櫃台服務員，行李內有免稅物品就可以喇！

▲ 相片來源：ezone.hk

4. 買得太多點算好？

買得太多點算好？咁就要睇大家搭咩航空公司。國泰、港龍、香港航空嘅經濟客位，包 20kg 寄倉行李，如果坐 JAL 或者 ANA，就包 2 件 23kg，廉航就睇大家買咗幾大件嘅寄倉行李啦。

如果買到忘曬形，超過咗自己寄倉行李限額點算好？如果大家唔係坐廉航，小記建議將部分物品 pack 好，去日本郵便局寄返黎，因為好似國泰咁，額外 1kg 要收 20 美金（155 港元），勁唔抵！廉航好似 HKExpress 咁，每額外 5kg 先係收 1,700 日圓（106.2 港元），就畀得過。

想寄嘢返嚟，去日本郵便局有幾種運送方式可以揀，以 5kg 為例，最貴嘅係 EMS 要 6,000 日圓（375 港元），2 日就到；最平係 2,500 日圓（156.3 港元）嘅平郵，預計 3 星期先送到香港。

▲ 相片來源：ezone.hk

原文刊於：ezone.hk